სააკაშვილი გამორიცხავს რუსეთის ”ახალ სამხედრო ავანტიურას”

პრეზიდენტმა სააკაშვილმა 5 მარტს განაცხადა, რომ გამორიცხავს რუსეთის მორიგ აგრესიას საქართველოს წინააღმდეგ.

”მე მინდა ვთქვა, რომ რა თქმა უნდა, ახლა ჩვენი მთავარი საზრუნავია ეკონომიკა, მე პრაქტიკულად გამოვრიცხავ დღევანდელ პირობებში - იმ პირობებში რა საერთაშორისო მხარდაჭერაც გვაქვს - ახალ სამხედრო ავანტიურას რუსეთის მხრიდან, მაგრამ როგორც შარშანდელმა წელმა გვაჩვენა სიფრთხილეს თავი ნამდვილად არ სტკივა, ჩვენ პირობებში ათმაგად არ სტკივა,”- განუცხადა მან აჭარაში სტუმრობისას ჟურნალისტებს.